Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Koopmanns Denken
 

von Detlef Kolze

Wenn jichenswat nich so funkscheneert, as dat schall, denn schrifft mennigeen Minsch 'n Breef an dat Ünnernehmen. He verklaart, wat em opfullen is, to'n Bispill dat de Post mit dat Daagblatt eerst 'n Dag to laat in'n Breefkasten leeg, un wünscht sik, dat de Lüüd door wat vun lehren köönt un dat tokünftig anners mookt.

Mehrstendeels kummt denn 'n Breef trüch, un door verklaart nu dat Ünnernehmen, worüm dat nich slumpt hett un dat se sik Möh geben wüllt, dat allens beter to moken. So mutt dat sien, ook wenn mit düsse Aart vun Künnigmoken oftins nich veel to beschicken is, wenn sik door nix an ännert. De Post mit dat Daagblatt kummt ook wieterhen jümmers woller maal 'n Dag to laat.

Wat den Oolen oftins ook noch argert, dat sünd de tosamenklüterten Breefen vun de Ünnernehmen. Doorför hebbt se Breef-Stücken praat, de op Hoochdüütsch "Textbausteine" heet. Dat gifft dat all langen, un dat is ook nnich wieter slimm. Bloots dat Tosamenklütern vun de enkelten Stücken funkscheneert oftins nich so recht, un denn höört sik de Breefen richtig schöön verdreiht an.

Över düsse Schrieberee lamenteer de Oole an'n Stammdisch un kreeg vun sien Fründ Heinz 'n schööne Antwoort. "Na ja", sä Heinz, "aus kaufmännischen Gründen ist das schon richtig so. Sollen die etwa 'n Schriftsteller engagieren, dass du sauber formulierte Antworten kriegst? Ist aller viel zu teuer."

Nu ja, antwoort de Oole, dat is 'n Argument, dat passt sik vundaage för veel Dummtüüch heel un deel goot. Denn "aus kaufmännsichen Gründen" is dat ook vernünftig, wenn so'n Ünnernehmen siene Lüüd nich ornlich betahlt, denn dat Utplünnern vun Minschen is beter för de Kass vun dat Ünnernehmen.

Un "aus kaufmännischen Gründen" is dat ook beter, wenn dat Ünnernehmen de Produkten so trechtfummeleert, dat se na korte Tiet twei gaht. Denn köönt se neeje Saken verköpen, un dat bringt Geld in de Kass.

To Huus driesel düsse Snackeree noch 'n beten döör den Oolen sien Kopp, un he dach: Villicht is dat sogaar de Karn vun mennigeen Elend op de Welt. Wi hebbt dat Geld un dat Geldverdeenen so dull in de Mitt vun uus Leben rückt, dat wi dat as dat wichtigste Maatband herkriegt, wenn wi vernünftig handeln wüllt.

De Koopmann mit sien Handels-Denken ward denn de Dreh- un Angelpunkt för allens, wat vernünftig sien schall. Schüddelt de Koopmann mit 'n Kopp, denn gellt dat för unklook. Düsse Aart vun Koopmanns-Denken mookt de Welt förwiss nich beter, sä de Oole.




 
   
     
   
     
      © by Nora Runge - Alle Rechte vorbehalten