Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Prospekt-Wahn
 

von Detlef Kolze

Allens op de Welt stüttig so'n beten wat beter moken - dat is 'n Gedank, de hett veel för sik, meen de Oole. Wat gifft dat överall to doon! Wi bruukt bloots an de veelen Minschen denken, de nich noog to eten un to drinken hebbt, or de Help bruukt, dat se nich süük un elennig ward. Wi köönt doormit ophören, dat wi uuse Welt as 'n groote Schietkuhl behanneln doot. Un ook dat Nadenken, of nu de Kapitalismus worraftig dat eenzige un dat beste för uuse Welt is, düt Nadenken is 'n goode Saak.
Man dat gifft 'n anner Flach, door schüddelt de Oole jümmers woller den Kopp, ook över sik sülbens. Doorbi geiht dat üm dat Sinneeren, wat he woll in de Wohnung, in't Huus or in'n Gaarn allens beter moken kann. "Optimierungswahn", nöömt he düsse Aart vun Gedankenkringelee för sik sülbens. Denn kummt em to'n Bispill in'n Kopp, of dat op den Balkon nich 'n schööne Saak weer, wenn he door so'n Markise anbringt. An 'n Namiddag kann de door schöön 'n Wien drinken, un wenn dat in 'n Sommer bloots so'n beten regent, denn kann he sik door verkrupen un nutt nich trüch in't Huus.
Förwiss, he sitt door gaar nich so veel op düssen Balkon, denn he hett ook 'n grooten Gaarn mit vermuckt veele schööne Placken, un he hett door 'n Glashuus un 'n grooten Wohnwagen. Un bi Regen kann he sik buten allerwegens in siene schöönen Ecken verkrupen un mutt ook nich na binnen afhauen. Desterwegen bruukt he keen Markise nich. Or he sinneert, dat he sik 'n neeje Bohrmaschien mit Akku köpen kann. Ja förwiss, he hett all een, man so'n neeje Maschien hett woll doch mehr Knööf. Avers bruukt he denn mehr Knööf? Wenn bruukt he dat? Eenmaal in twee Jahren? Allens Schandudel, denkt he denn un smitt dat Prospektheft weg.
Düsse Prospektheften sünd dat ook, de sien "Optimierungswahn" anstökern doot. Door süht he schööne Stöhl för'n Gaarn. Denn is door 'n Plastikbecken to'n Swümmen. Dat weer ja wat för de Enkelkinner. Or schall sik de Oole 'n Filteranlaag för sien Poggenpool toleggen, doormit dat door nich so veele Algen in rüm swümmt? Man düsse Algen un dat Aantenflott kann he doch ook wegfischen. "Mühsam, aber sehr effektiv", harr he annerletz lesen.
Or so'n Plastikverslag för de Tomaten? Or 'n Tuun, dat de Snicken nich mehr an sien Salaat ran kamen köönt? Sien Broder hett sik sowat köfft. Dat funkscheneert, man dat harr för 'n paar Quadratmeters mehr as 60 Euro köst. Veel to düür. Door kann ik mi ja teihn Jahren all den Salaat för köpen, dach de Oole. He schüddel wedder den Kopp. Wees tofreden mit dat, wat du hest, dach he. Dat is worraftig noog för di. Un holl op mit düssen Optimierungswahn an de verkehrte Stee.
 




 
   
     
   
     
      © by Nora Runge - Alle Rechte vorbehalten