Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Callas-Arien
 

von Detlef Kolze

De Oole höör jümmers geern 'n CD mit Arien vun Maria Callas. De weern tosamen sammelt ut verscheeden Opern.
Wunnerbar, düsse Musik! Grootorrig, düsse Stimm! In düsse schööneWelt vun Töön kunn de Oole jümmers woller indükern un tofreden vör sik hen sinneeren.
Un liekers wüss de Oole: Door fehlt wat. Denn jeedeen vun düsse wunnerbaaren Arien hett sowat as 'n Vörspeel. So'n Oper stellt jümmers 'n Geschicht vör Oogen, to'n Bispill 'n dramaatsche Leefsgeschicht, dat Drama vun 'n groote Leef twüschen twee Minschenkinner.
Jüst so as bi de Leef vun Mann un Fru höört de groote Oogenblick un dat Vörspeel ook in de Oper tosamen. Wi bruukt bloots  maal an Giacomo Puccini sien "Tosca" un de grootorrige Arie "Vissi d' arte" denken, sä de Oole. Wat door worraftig aflopen deit, dat köönt wi bloots verstahn, wenn wi dat "Vörspeel" kennt.
Door is de Böverste vun de poliitsche Polizei, de jüst doorbi is, Mario Cavaradossi, den Leevsten vun Floria Tosca, to tribbeleeren, bit op't Bloot.
Un düsse Keerl will Tosca an de Wäsch un will ehrn Lief, wieldess siene Lüüd glieks blangenan ehrn Leevsten meist doot mookt. Un Tosca föhlt nix anners, as dat se sik düssen Polizei-Keerl hengeben mutt, doormit se ehrn Mario retten kann.
In düssen Oogenblick singt Floria Tosca dat Leed "Vissi d'Arte". Se singt, dat se bit nu alltiet bloots för de Kunst un för de Leev op de Welt weer un dat se keen lebennig Wesen wat andoon harr. Dat se jümmers holpen harr, wenn se Elend to sehen kreeg, un dat ehr Globen ehr doorbi 'n groote Help weer. Un denn fraagt se ehrn Gott, worüm he ehr dat nu so danken deit.
Eerst wenn wi dat allens weet, denn köönt wi begriepen, dat hier nich bloots 'n wunnerbaare Arie to hören is. Denn weet wi, dat hier 'n groot Seelen-Drama aflopen deit, dat bit to de Fraag geiht, worüm Gott sowat tolett. Un wi begriept, worüm düsse sachtmödige Fru 'n paar Oogenblicken later den Polizei-Baas doot moken deit.
So is dat mit allens, wat op de Welt passeert, menn de Oole, ook in de Politik. Wi mööt weten un begriepen, wat vörweg passeert is. Eerst denn kriegt wi dat gröttere Bild in uusen Kopp un nich bloots den enkelten Vörfall.
Door mag de Musik noch so schöön sien. Eerst mit uus Weten köönt wi allens hören, wat in so eene wunnerbaare Arie binnen sticken deit.
Liekers höör ik de CD mit de enkelten Arien von Maria Callas jümmers woller geern, sä de Oole, ook wenn sik dat allens eegenlich üm so'n grugelig Drama dreiht.
Dat Indükern in'n grooten un schöönen Oogenblick mookt uus oftins mehr Vergnögen as dat Weten vun noch een Drama in uuse Welt.




 
   
     
   
     
      © by Nora Runge - Alle Rechte vorbehalten