Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Lütt un Groot
 

von Detlef Kolze

Lütt un Groot - dat weer för den Oolen jümmers 'n intressante Saak wesen. Doorbi güng dat nich bloots üm dat Baben un Ünnen in uuse Gesellschaft, üm Rick un Arm, nee, he intresseer sik ook, woans de Biller vun uusen Alldag in de Minschenköpp trecht schrapelt ward. Un doorbi speelt dat Lütt un Groot in uuse Medien förwiss 'n besünnere Rull.
So sehg de Oole in sien Daagblatt annerletz 'n lüürlütten Text över Minschen, de mit Rad un mit Auto ünnerwegens weern."Vom Auto erfasst", stünn door. De Text füng mit 'n paar Wöör an, dat 'n Radfahrer "nach dem Tzsammenstoß mit einem Auto" doot bleben weer. Dunnerslag, dach de Oole, 'n "Zusammenstoß"? Man woans keem dat to düssen "Zusammenstoß"?
De Saak weer eenfach: De Radfahrer müss gaar nix doorbi doon. Denn dat lang hen, dat 'n anner Minsch mit sien Benzinkalesch "die Kontrolle über sein Auto verloren hatte, war von der Fahrbahn abgekommen und prallte mit dem entgegenkommenden Radfahrer zusammen". Mit klaare Wöör: De Minsch mit sien Auto harr den Radfahrer doot mookt, wiel he villicht go gau ünnerwegens weer or wiel he eenfach nich oppasst harr.
Dat mookt den Ünnerscheed twüschen Lütt un Groot düütlich, meen de Oole. So'n Minsch op sien Rad kunn sowat nie nich tostannen kriegen. He kann sik villicht sülbens to Doode bringen. Man dat he 'n annern Minschen mit sien Rad doot mookt, dat is meist vullstännig unmöglich.
Düsse Text över dat Dootmoken vun'n Radfahrer döör 'n Autofahrer weer lüürlütt. Düütlich mehr as teihnmaal so groot weer in datsülbige Daagblatt 'n Text, dat sik 'n Minsch op sien Rad Kopfhörer över de Ohren stülpt harr un desterwegen nix vun dat Auto achter em mitkreeg, as he dweer över de Straat fahren wull. Door weer sogaar 'n groot Bild doorbi, un door weer ook groot to lesen: "Ablenkung im Straßenverkehr oft unterschätzte Gefahr".
Dat stimmt, brummel de Oole för sik hen. Bloots wenn 'n Radfahrer nich oppasst, denn bringt he sik sülbens in Gefahr. Wenn 'n Autofahrer nich oppasst, kann he annere doot moken. Dat is doch villicht 'n Ünnerscheed, wo 'n op Acht hebben mutt. Lütt un Groot - de Oole weer seker, dat de Minschen veel lehren köönt, wenn se door maal 'n Blick op richten doot.




 
   
     
   
     
      © by Nora Runge - Alle Rechte vorbehalten