Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Wunnerwelt
 

von Detlef Kolze
De Fru will na de annere Siet vun de Straat. Se drückt op den lütten Kasten an den Ampelmast - un in'n sülbigen Oogenblick springt dat Licht vun Root op Gröön. De Fru dröff loos lopen. Se is verbaast, so fix harr se sik dat gaar nich vörstellt.
Een Mann ammelt de Straat langs. He simmeleert över 'n oolen Knütten. Door mutt doch 'n Dreih an to kriegen sien, denkt he. Miteens geiht em 'n Licht op un he weet, wat he doon mutt. Vergnöögt weiht he mit de Arms döör de Luft, un in 'n sülbigen Oogenblick geiht dat Licht an all de Lampen op de Straat an.
Sowat gifft dat, un wi wunnert uus oftins över dür vigeliensche Tosamenfallen vun twee Saken, de afsluuts nix mit'n anner to kriegen hebbt. Denn de Fru an de Ampel harr op jichenseen Kasten rop drückt, de gaar nix mit dat Wesseln vun Eoot na Gröön to doon hett. Dat is bloots de Kasten för den Summtoon, dat ook de Lüüd Bescheed weet, de nich so goot kieken köönt. Man de Fru weer afsluuts seker, dat se sülbens mit ehr Drücken för de grööne Ampel sorgt harr.
Bi den Mann op de Straat weer dat nich anners. Dat sien Infall nix doormit to kriegen harr, dat jüst in düssen Momang dat Licht op de Straat angüng, dat versteiht sik. Un liekers blifft door so'n heemlich Geföhl, dat door jichenswat achter steken kunn.
Jüst sowat passeert ook in uuse poliitsche Welt jümmers woller. Door sünd twee Saken, de to glieke Tiet passeert, un veele Minschen glöövt, dat se worraftig tosamen hangt un dat de eene Saak de Ursaak för de annere Saak is.
Bloots as Bispill: De Polizei vermellt, dat in't verleden Jahr mehr Inbrekers ünnerwegens weern. To glieke Tiet hebbt wi in uus Daagblatt lesen, dat mehr Flüchtlinge ankamen sünd. Aha, seggt wi, door hebbt wi dat.
Man dat stimmt nich. De Experten op düt Rebeet köönt uus dat verklaren: Twüschen düsse beiden Saken gifft dat keen worraftigen Tosamenhang. Se sünd bloots to glieke Tiet passeert.
Dat is jüst so, as in de Aadbaar-Geschicht: Wi leest, dat in't verleden Jahr woller veel mehr Störk in uuse Gegend leevt hebbt. Un wi leest ook, dat in't verleden Jahr woller mehr Kinner op de Welt kamen sünd as in de Jahren vörher.
As Kinner hebbt wi dat fröher nnoch lehrt, dat de Stork de Kinner bringt. Man nu weet wi, woans dat funkscheneert.
Wenn twee Saken to glieke Tiet passeert, heet dat noch nich, dat se ook worraftig tosamen hangt. Dunnerslag, sä de Oole, dat kann 'n sik ja woll maal marken.
Un he hau mit 'n Knall op'n Disch. In'n sülbigen Oogenblick kunn he in sien Feernsehkasten sehen, dat in Schinesien da famööse Sack Reis ümfallen dä.
De Welt is vull vun Wunner, grummel de Oole. Eeen groot Wunner is, dat so veele Minschen sik jümmers noch wat vörmoken laat un dat se nich begriepen wüllt, dat to glieke Tiet nich automaatsch tosamenhangen bedüden deit.




 
   
     
   
     
      © by Nora Runge - Alle Rechte vorbehalten