Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Statistiken
 

von Detlef Kolze

Wenn wi över dat Minschenleben in jichenseen Land op de Welt wat weten wüllt, denn söökt wi na Kennzahlen, de uus 'n Bild malern schüllt. Denn findt wi to'n Bispill dat Bruttoinlandsprodukt ("BIP") or de Tahl vun de Lüüd ohn Arbeit un mit Arbeit or den Export un Import vun Saken un all sowat. Besünners wichtig is doorbi de Richt vun düsse Tahlen. Geiht dat na ünnen or geiht dat na baben hen?
So mookt wi dat oftins, man dat is verkehrt, meent de Oole. Dat gröttste Bedüden hett na sien Meenen jümmers dat Leben vun de powerigen Lüüd. Woans kaamt se in ehrn Alldag torecht? Kiek in de Minschen-Gesellschaft na ünnen un an de Kanten, wenn du wat över 'n Land ruutfinnen wist, seggt he. Un doorför bruukt wi Bispillen un Berichten, nich Tahlen.
Denn Tahlen langt nich hen, wenn wi den Alldag vun Minschen begriepen wüllt. Jeedeen kennt dat Lehrstück: Twee Minschen gaht to'n Eten na 'n Lokaal. Eeen vun de beiden pramst sik twee braden Hehn un twee groote Buddels Beer in'n Lief. De annere sitt doorbi, lickt sik dat Muul un kiekt, woans de eerste slampampen kann.
Bekiekt wi uus achterna de Statistik, denn sünd door twee Lüüd, de sik twee braden Hehn un twee Buddels Beer to Bost slahn hebbt. Dat is för de Statistik 'n klaare Saak: Mookt wi 'n Snitt, denn hett jeedeen 'n braden Hehn un 'n Buddel Beer kreegen. So seggt dat de Tahlen in de Statistik, un de Snitt is worraftig jüst so. Man düsse Tahlen seggt nich dat Richtige över dat Leben vun düsse twee Minschen. Denn de beiden hebbt nich dat kreegen, wat de Tahlen seggt. De eene hett allens kreegen un de annere gaar nix.
So is dat mit veele Saken, seggt de Oole: Döörsnitt un Tahlen sünd dat eene, man dat Alldagsleben vun de Minschen is oftins wat heel un deel anners. Man jüst doorför mööt wi uus intresseeren. Wi mööt uus över ehr Leben vertellen laten un goot tohören. Un wi dröfft uus mit jichenswekke Tahlen un Statistiken keen Sand nich in de Oogen streuen laten, sett de Oole doorto.




 
   
     
   
     
      © by Nora Runge - Alle Rechte vorbehalten