Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichwörter

 
  Gesundheet
 

De Oole harr 'n Termin bi'n Dokter - Middags Klock twee. Dat weer 'n dösige Tiet för em, denn eegenlich liggt he üm Klock twee lingelang op sien Sofa un dööst un  drusselt 'n beten wat vör sik hen. Eendoon, dat güng nu maal nich anners, un de Minsch kann sik nich allens in sien Leben utsöken. Dat eene un dat annere kummt em över'n Hals, un door is 'n unglückliche Tiet bi'n Dokter all langen nich dat Slimmste.
Man düsse Middags-Termin driesel den Oolen all Morrns döör 'n Kopp. Dat he dat bloots nich vergeten dä! Un de praktischen Fragen för de Tiet bit doorhen, to'n Bispill: Geiht he vörher noch in'n Gaarn un püttschert 'n beten rüm? Villicht kummt he noch in't Sweten un mutt noch ünner de Bruus? Allens Undöög, he mutt de Tiet anners rümkriegen.
Fröer, as he noch nich Rentner weer, door weer sowat öberhaupt keen Fraag. He harr den heelen Dag över to doon, un de Termin bi'n Dokter müss door rin passt warrn. Door geef dat keen Nadenken, denn de Dag weer vull vun allerlee Terminen.
De Oole lüsster na de Klock. Dat güng op Middag, un he föhl: He weer mööd, vermuckt mööd. Dat is de Schiet, wenn sik de Minsch an wat wennt hett. Middagslaap to'n Bispill. Wenn de Tiet ran rückt, dennso ward binnen de Knipser op "Roh un Freeden" instellt - sowat stickt deep in Lief un Seel. För den Oolen weer so'n Dag argerlichen Kraam. Sien schöönen geruhigen Rentner-Dag weer döörnanner stökert. Un doorto keem noch dat liese Bangesien. Of he woll ook dütmaal woller Dusel harr un nix wieter vördaag keem, wat all in sien Bit nu weer he noch nie nich eernsthaftig vun de Been kamen. In't Krankenhuus weer he toletz as Kind wqesen un twischendöör 'n paarmaal, wenn he door jichenseen Kranken besöcht harr. Dat Slimmste bi em sülbens weer 'n Hoosten or 'n  Snuppen, anners nix, afsluuts nix. Dat kunn doch nich so wieter gahn, dach de Oole oftins. Jichenswenn mööt se di bi'n Krips kriegen.
De Oole hett recht, dat is klaar: Jichenswenn is he an de Reeg. Man ook dütmaal güng dat goot bi'n Dokter. Förwiss, dat weer noch beter wesen, wenn he bi düt schööne Wedder to'n Bispill in sien Gaarn ramentern kunn. Man wi wüllt nich överspöönsch warrn, grien de Oole. Gesundheet is dat wichtigste för jeedeen Minschen, un door kann ik eerstmaal woller tofreden sien. Versteiht sik, sett he denn still doorto: So lang, as't duurt.




 
   
     
   
     
      © by Nora Runge - Alle Rechte vorbehalten