Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Verkehrte Reken
  von Detlef Kolze He wull Geld verdeenen, vermuckt veel Geld, sä de annere un rekel sik in de Sünn op de annere Siet, dat he sien Macker ankieken kunn. Mit düssen annern müss he tosamen den Dag rümbringen, wiel se nix wieter to doon harrn. Doorför harr he sik ’n Plaan utklamüüstert, verklaar he wieter, un de harr dat in sik. Toeerst wull he maal düt un denn müss he dat un denn racker he un wurach - un so verklaar he sien Plaan för’t groote Geldverdeenen nipp un nau un bit op den lesten Dreih, de na sien Meenen nix anners weer as scheniaal. Wat meenst doorto? fröög he den annern. De keek em bloots still an un wull weten, wat denn an’t Enn doorbi ruutkamen schull. Un sien Macker hang sik noch maal in de Sielen un maler allens bonschenbunt ut un verklookfidel noch ’n tweetes un ’n drüttes Maal, woans dat mit sien grooten Plaan för’t Geldverdeenen un för’t Glücklichwarrn aflopen schull. Dat meen ik nich, antwoort de annere. Mi dücht, ik heff dat schoon begrepen. Ik will weten, wat door an’t Enn bi ruut kamen schall. Un as de eerste all woller dicke Backen mook, sett he noch doorto, dat doorbi Geld ruut kamen schull, veel Geld, dat wüss he nu. Man wat he mit dat veele Geld anfangen anfangen wull - dat wull he mit sien Fraag ruutkriegen. De eerste keek em so’n beten wat verbaast an un müss ’n Oogenblick sinneeren. Tja, sä he, he wull soveel Geld verdeenen, dat he opletz an all dat Afmarachen un Wurachen un Rackern nich mehr denken müss. He wull denn eenfach sien Roh un sien Freeden hebben un in de Sünn sitten un tofreden op de Welt sien - as’n richtig glücklichen Minschen. So, dat wist du, leet de annere sik hören un schuuf sik sien grooten Hoot för’n Oogenblick ut de Steern. Dat meenst du. Man - dat hest du doch nu ook all, ohn dat du eerst veel Jahr lang rümramentern un rackern un wöhlen muttst. Du hest doch all de Tiet vun de Welt un kannst rümsitten un eenfach bloots door sien as’n glücklichen Minschen. Förwiss, du hest nich allens, sä he - nich noog Geld to’n Bispill un keen Auto un keen groot Wohnhuus un keen vullproppten Keller mit Wien, man du hest Tiet un kannst sinneeren un di de Welt bekieken. Versteiht sik, so’n Gedankenspeeleree hett wat vun’n Karikatur an sik, man door stickt woll liekers ’n richtigen Karn binnen: Wi mööt vermuckt veel Knööf insetten, dat wi an’t Enn dat winnen köönt, wat wi vörher all harrn - freeje Tiet to Rümsitten un Nadenken. Jichenswat stimmt bi all dat Reken nich. Bloots wat is dat?


 
   
     
   
     
      © by Nora Runge - Alle Rechte vorbehalten