Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Multitasking
  von Detlef Kolze Vun den römischen Kaiser Julius Cäsar kriegt wi to weten, dat he mit eens un to glieke Tiet nich bloots sülbens 'n Breef schrieben kunn, man ook noch 'n paar anere Breefen dikteeren. Un jüst so kunn he mit 'n Foot 'n Takt petten un in'n heel un deel annern Takt jichenswekke Drüppen op'n Löpel tellen. Vundaage heet sowat Multi- tasking, wenn de Minsch or de Computer verscheeden Saken op'n maal moken kann. Nu kennt wi düsse Geschichten över Cäsar bloots döör Plinius un Plutarch, man wi wüllt dat maal glöven, dat so'n Keerl dat worraftig tostannen bröch, dat he 'n paar Saken opmaal moken kunn. Man vundaage wüllt se uus wies moken, dat jeedeen Minschen sowat kann - allens döörnanner un to glieke Tiet. Fachlüüd lacht över sowat. Twaars kriggt de Minschenkopp mehr trecht, as wi mennigmaal glöven möögt, man wat toveel is, is nu maal toveel. Dat kann 'n bewiesen, stellt de Experten klaar, dat de Minsch döör dat stüttige Hen un Her opletz nich so veel op de Reeg bringt, as wenn he mehr sien Roh harr. Na ehr Meenen kann uus woll fix wat in'n Bregen glippen, man dat glippt denn ook jüst so fix woller ruut. Sünd de Minsch an de Arbeit un denn kummt jichenswat doortwüschen, denn bruukt se 'n paar Minuten, ehr dat se woller vullstännig bi de Saak sünd. Veele Ünner- nehmen hebbt dat middewielen ook markt un wiest ehr Lüüd desterwegen an, dat se bi de Arbeit to'n Bispill bloots noch tweemaal an'n Dag na de elektroonsche Post kieken dröfft - de Post för ehr Arbeit, versteiht sik, denn ehrn Privatkraam dröfft se in de Firma all langen nicht mehr blangenbi mit moken. Un dat Döörnanner geiht tohuus kregel wieter. Keen sik dat maal ankiekt, wat wi'n half Jahrhunnert trüch an Instrumenten för Spaaß un Speel in't Huus harrn - villicht 'n Radio, beten later den Feernsehkasten in swatt un witt un mit twee Programmen un jümmers mehr ook 'n Telefoon buten op de Deel - keen door över nadenkt, de schüd- delt mit'n Kopp, wenn he den Schandudel vundaage vör Oogen hett. Feernsehen mit'n paar hunnert Programmen, dat Internet mit Millionen vun Biller un Texten un Speelen, 'n Telefoon in elkeen Tasch, dat avers ook to'n Speelen un Kieken un Schrieben döggt, Fotos, Podcast, Konsolen för't Speelen. Multimedia-Center - allens "Massenzerstreuungswaffen", hett maal een seggt. De Welt ward jümmers verrückter - dat hebbt de Oolen to all de Tieden seggt. Man nu is dat worraftig sowiet, dücht mi. Or lacht se mi in teihn Jahren ook woller ut för so'n dösige Snackeree?


 
   
     
   
     
      © by Nora Runge - Alle Rechte vorbehalten