Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Afschalten
  von Detlef Kolze Keen kennt sowat nich: Wi sitt mit jichenseen Minschen tosamen un snackt. Miteens höört wi 'n Brummen or Snurren, 'n Bimmeln or Krieschen, 'n Stimm or 'n Sireen. De annere tuckst tosamen un fummeleert as'n kopplosen Hahn in siene Taschen rüm, bit dat he wat vördaag bröcht hett un "Ja!" or "Hallo!" door rin snackt. Un wi sitt em gegenöver un sünd afmeldt. Dat gifft sogaar Lüüd, de staht op jichenseen Podest un hollt 'n Reed, un denn bimmelt or bammelt wat - un se fangt merrn in de Reed an to telefoneeren. De Tohörers staht eerstmaal an de Siet un mööt Gedüür hebben. Düsse Aart vun Benehmen hett sik in de lesten Jahren utbreedt as'n Pest - wi findt meist keen Minschen mehr, de sik düssen Telefoneerschiet vun'n Hals hollen kann. Förwiss, keen sik as so 'n Pappstoffel opföhren deit, de hannelt toeerst maal snöselig un flappsig, un door ännert sik gaar nix an, wenn sowat begäng worrn is. Man sowat is ook utverschaamt, denn so een klaut uuse Tiet weg. He deit so, as harrn wi door noog vun, wieldess för em sülbens de Tiet so düür is, dat he uus ruhig afhängen un bisiet schuven kann. Nu gifft dat ut uuse Bedrieven un sünnerlich ut dat amerikaansche Silicon Valley wat to vermellen, dat hier 'n schöönen Kontrapunkt setten deit. Denn woneem se bit herto wiet an de Spitz mit all den elektroonschen Kraam weern, de dullsten Telefoneerschachteln un de lüttsten Klapp-Computers tosamenprökelt hebbt, door fangt se nu an, dat se sik bi de Arbeit ook maal woller ohn all düssen Schandudel tosamen setten wüllt. "Afschalten!" heet door middewielen de groote Parool, denn wenn de Lüüd nich mehr direktemang un ohn Aflenken tosamen kamen doot, denn geiht jem wat verlüstig, wat nich verlüstig gahn dröff. Un so steiht door in't Silicon Valley middewielen in mennigeen Ünnernehmen woller eenmaal in de Week dat Tosamenkamen op'n Kalenner, ohn dat jichenseen elektroonschen Krimskraams mit doorbi sien dröff. Mennigmaal mööt de Lüüd düsse Dinger sogaar afgeben, dat se gaar nich eerst in Gefahr kamen köönt un doch insgeheem maal eben nakieken doot, of door jichenswat Neejes ankamen is. "Topless" nöömt se dat un speelt so doormit, dat de Laptops un all ehr Süstern un Bröders buten blieben mööt. Wat door opdükert, is de Gedank, dat düsse technische Kraam de Minschen mehr döörnanner bringen kann as dat goot is - un dat sowat mennigmaal 'n Gift för't Lehren, Arbeiten un Leben is. Afschalten meent mennigeen in Silicon Valley. Wi hebbt jem soveel Saken namookt - worüm nich to'n Afwesseln ook maal dat?


 
   
     
   
     
      © by Nora Runge - Alle Rechte vorbehalten