Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Grugelige Pien
  von Detlef Kolze Door sitt ’n Minsch in’n Buddel. He weet nich, woans he door woller ruut kamen schall. He hett wat söcht, much geern wat utprobeeren, wull wat anners moken in sien Leben, wull sik ännern. Man jichenswenn kreeg de heele Saak ’n vullstännig eegen Dreih. De Minsch kunn sien Doon nich mehr in de Hand behollen. Dat Leit över sien Handeln güng em verlüstig, ofschoonst he sülbens allens in de Gangen bröcht harr. Un opletz sitt he in’n Buddel. Mag wesen sowat klingt för mennigeen ’n beten wat verdreiht un vigeliensch. Wat kann door ’n Minschen passeeren, dat he sülbens wat anstöten deit un kann dat achterna nich mehr faat hollen? Dat he wat uprobeert un dat em doorbi wat över’n Hals kummt, woneem he nich mehr gegenan kamen kann? Keen maal ’n Oogenblick sinneert, de kummt door villicht op, dat to’n Bispill dat Supen or annere Süchten bi veele Minschen jichenswenn maal jüst so in de Gangen kamen sünd. Door weer toeerst nix as dat Utprobeeren un dat Rinstökern in’n Geheemnis, dat Wetenwullen vun Saken, de ’n bi öllere Lüüd sehen hett un de wat heel un deel Besünners wesen müssen. Jeedeen Minsch, de vun düsse Süchten sien Leeftiet nich mehr weg kamen kunn, de harr jichenswenn maal jüst so anfungen un sik denn doorbi verhakelt. Wat vundaage bi veele junge Deerns in Mood is, dreiht sik üm de Figuur un dat Eten. Rank un slank wüllt se sien, so as se dat sehn köönt, wenn se de Reklaam ankieken doot or de Films in’t Feernsehn un in’t Kino. Flach mutt de Buuk ween, dat 'n mit sien Disco-Kleddaasch ’n goode Figuur mookt. Denn door mutt nich bloots de Bost na baben snöört warrn, door mutt an’n Buuk ook dat blanke Fell to sehen sien - sowat schrifft de Mood jümmers woller maal vör. De mehrsten jungen Minschen kaamt doormit klaar, jüst so as mit Zigaretten un mit Spriet un annere Drogen. Denn alleen dat Utprobeeren is noch nich de groote Knütten. Jichenswenn kann door wat mit to kamen, un denn blifft de eene un de annere door an backen un sitt in’n Buddel. He mutt denn föhlen, wat dat heet, dat he nich mehr dat Regeer över sien Handeln hett un mit sien Süchten an’n Hals meist toschannen ward. Keen dat ut de Neegde mit beleevt, de kann de grugelige Pien ahnen. Un na’n Tiet kennt he ook de eenzige Wahl - mit grugelige Pien den Weg ruut söken or mit grugelige Pien in’n Buddel sticken blieben. Annerswat gifft dat nich mit Süchten.


 
   
     
   
     
      © by Nora Runge - Alle Rechte vorbehalten