Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Weg un Ümweg
  von Detlef Kolze Wat de Minschen nich dröfft, jüst dat mookt jem besünners scharp, heet dat in’n ool Leed vun Wolf Biermann, as he dunntomalen noch "n opregen Singer weer. So is dat nu maal. Dat Seelenleben vun uus Minschen rengelt sik siet steenoole Tieden an dat langs, wat för de Minschen eegenlich verboden is. Mennigeen denkt sik dat villicht as’n wunnerbaare Saak, wenn he in jichenseen Paradies eenfach so op de Welt sien kunn. Wenn em allens in’t Muul wasst, wat he geern to’n Snabbeleeren hebben much. Wenn dat Wedder jümmers schöön un warm un vull Sünnschien is un wenn em nix verdwars kummt. Un wenn’t sogaar in de Leev Tostänn as in’t Paradies geben deit. Man dunntomalen in dat oole Paradies an’n Beginn vun de Eer leep dat ja ook op Schiet ut, wiel dat för Adam un Eva to langwielig weer un de beiden opletz wat finnen kunnen, dat se sik mit den leeven Gott in de Haar kreegen. De Minsch bruukt dat Doorweddersien un den Striet, anners kann he nich leben un anners kann siene Seel nich wassen. Man vundaage fehlt an mennigeen Stee op de Eer dat Verbeeden. Woneem dat över lange Tieden 'n Tabu or tominnst ’n düütlich "Nee" geef, door heet dat nu oftins "Laat man lopen" un "anything goes". Bloots, wenn bi so veele Saken in de Welt gaar keen "Nee" un gaar keen "Dat is verboden" mehr to hören is, denn hebbt de Minschen nich mehr noog to’n Doorweddersien. Un door liggt de Knütten. Door bruukt wi bloots in uuse Schoolen kieken, un wi findt veel to veele Schoolmeisters, de nix as goode Frünnen vun de jungen Lüüd sien wüllt un de nich mehr noog Knööf un Kraasch hebbt, dat se mit de Kinner dat eernsthaftige Strieden üm dat richtige Doon un Handeln anfangt. Un ook dat Nich-glieks-wat-kriegen höört mit in düssen Gedankenweg, all dat Aftöven un Rings-ümto-Speelen un Noch-nich-klaar-Weten. Förwiss, dat hett allens siene düüstern Sieten un bringt mennigeen üm siene Seelenroh un üm sien Slaap. Un liekers: Achterna is dat denn eben ook soveel schööner, as wenn wi all dat Anstrengen un Afstrapzeeren gaar nich eerst harrn. Dat heele Leben is eegenlich sowat as’n Ümweg, köönt wi seggen. Denn direktemang weer dat man bloots ’n lüürlütt Stück Weg vun de Geburt hen na’n Dood, un dat is opletz doch verdüvelt wenig. Eerst de Knütten un all dat Ümgahn mit verboden Saken un dat Doorweddersien mookt dat Minschenleben so lebennig.


 
   
     
   
     
      © by Nora Runge - Alle Rechte vorbehalten