Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Nebbiolo-Wien
  von Detlef Kolze An den grooten italieenschen See Lago Maggiore liggt de lütte Stadt Cannobio - ’n heel un deel wunnerbaaren Placken op düsse Eer. Över de Jahrhunnerten is de Oort wussen un wiest sik nu as ’n grootorrige Komposition vun Hüüs un Bööm an een Promenaad direktemang an’t Water. Hier hett ’n dat Geföhl, dat allens in’t Loot is, wat se door hen boot hebbt. Nix to finnen vun Event un opregen Hest-du-dat-all-sehn. An düsse Promenaad gifft dat ’n Laden för Wien, denn dat Piemont is famöös för goode un ook düüre Soorten vun Wien, to’n Bispill för den Bardolino un den Barolo. "Casa Bava" heet de Laden, na Giuseppe Bava, de hier mit dat Wienverköpen sien Geld verdeenen deit. De Lüüd sünd riek worrn mit düt Geschäft, man liekers lett dat so, dat se op’n Teppich bleben sünd. Süht so ut, as güng dat nich alleen üm dat groote Geld, man ook noch üm dat Doon un Handeln op den Weg door hen. So snackt de Baas vun den Bedriev geern över den Wien "Nebbiolo". Mit em is nich so licht ümgahn, seggt he, un he bruukt siene Jahren in Keller un in de Flasch, bit dat he sik vun de beste Siet wiesen deit. Ook för’t Geschäftemoken hollt Giuseppe Bava an oole Regeln fast. So blifft de Laden dicht, wenn Wochenmarkt is mit veele dusend Minschen, de denn de Promenaad langs dammelt. Man de Markt is nu maal an’n Sünndag, un dat is ’n "unersetzlicher Ruhetag", meent de Baas. Geern besinnt he sik op siene Kinnertieden, as de Familie noch richtig arm weer. Ofschoonst dat middewielen veel beter worrn is, so denkt he doch mit ’n beten Wehmoot trüch "an die Tafelrunden mit vielen Tischgenossen, an die prächtigen Küchen voller menschlicher Wärme und ohne Fernseher". He will nix verkliestern un schöön malern. He will woll bloots seggen, dat uus Vörankamen oftins mit ’n Verlüstiggahn in eens geiht. För sien Leben sett Giuseppe Bava dree Saken an, de ’n sik eenfach maal bekieken kann, ook wenn een to’n Bispill mit Gott un Globen nich veel anfangen kann. Wi schüllt handeln in’n deepen Globen an dat högere Wesen, dat uus op Wegen vull vun Geheemnis stüürn deit, meent de italieensche Handelsmann för Wien. Dat tweete: Wi schüllt bloots bange sien vör dat Bangesien. Un wat för mi as’n besünners schöönen Gedanken doorsteiht: Wi schüllt so leben, "dass uns niemand zum Erröten bringen kann". Sowat, dücht mi, is oold un liekers op de Hööchte vun de Tiet.


 
   
     
   
     
      © by Nora Runge - Alle Rechte vorbehalten