Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Elektroonsche Welten
  von Detlef Kolze De Oole harr jümmers 'n besünneres Vergnögen an düsse elektroonschen Apperaaten, de allens mögliche op de Pann hebbt. Annerletz weer he annerwegens to Besöök, un door stünn so'n Dings op de Kommood, dat he jümmers woller bekieken müss. Worüm? Door weer de heele Tiet wat an't Blinkern un Blänkern. Eerstmaal weer dat de Tiet, de door groot to sehen weer - mit döörlopen Sekunnen un dat Flackern vun twee Punkten twüschen de Stünnen un de Minuten. Glieks blangenan stünn dat Datum, un merrnmang kunn de Oole op'n Batz ruutfinnen, wat de Stuuv för 'n Temperatuur harr un of de Luft villicht to fuchtig weer. Wat den Oolen nu meist ansugen dä, dat weer so'n Aart vun Weerwieser. Elektroonsche Wulken kunn he door utmoken, avers ook blanken Sünnschien or grugeligen Regen. Un dat Besünnere doorbi: Dat stimm nie nich mit dat Weer övereen, dat buten worraftig to föhlen un to sehen weer. Un so prasseln de grooten Regendrüppen för dull an de Schiev vun sien Huus, wieldess de Apperaat besten Sünnschien ankünnigen dä. Annermaal blänker buten de Sünn, man de elektroonsche Experte för't Weer stell 'n dennig Pladdern op sien Bildschirm door. Of dat mit de Mondphase to doon harr or mit den Luftdruck, de ook aftolesen weern, dat wüss de Oole nich. Wat he ook nich recht ruutkriegen kunn, weer so 'n Blinkern vun Streken, de na sien Meenen de Temperturen vun de lesten 12 Stünnen afkunterfeien schulln. Avers dat kunnen ook de lesten veer Weken or de lesten söss Maanden wesen. Man he weer bange, an de Knööp mit de Wöör "Select" un "Mode" to dreihen. He weer ja to Besöök in düt Huus, un door speelt 'n mit sowat nich rüm, dach de Oole. So kunn he ook nich utprobeeren, wat de Apperaat anners noch tostannen bringen kunn. Dat door 'n Radio un 'n Wecker mit binnen steek, kunn he vunwegen dat Woort "Alarm" licht vermoden sien. Un vun tohuus kenn he dat Woort "Snooze" - doormit kunn sik de Minsch bi't Pingeln 'n beten Tiet to'n Dösen ruuthandeln. Dat de Oole ook noch klaar kriegen kunn, wenn morrns de Sünn över de Kant kruup un wenn se avends woller weg weer un dat he door twüschen nipp un nau 13 Stünnen un 20 Minuten Tiet ohn Düüsternis harr, dat freu em. Schaad weer bloots, dat he nix vun de Temperatuur buten aflesen kunn. Bloots Streken, un keene Tahlen. Door is denn woll de Kontakt vun de virtuelle Welt na de echte Welt vullstännig verlüstig gungen, dach de Oole un grien liesen


 
   
     
   
     
      © by Nora Runge - Alle Rechte vorbehalten