Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Öller warrn
  von Detlef Kolze Wat harr sik de Oole fröher in siene Kinnertieden freut, wenn he Geburtsdag harr. All de schöönen Geschenken, de door op em töven, de Lichter op'n Disch, dat Singen, dat In'n-Arm-Nehmen - Jungedi, sowat kunn na sien Meenen ruhig mehr as eenmaal in't Jahr passeeren, dach he dunntomalen. Un jeedeen Jahr dröff he mehr moken. Tööv man af, bit du 'n beten wat öller büst, kreeg he to hören, wenn Vadder un Mudder nich inverstahn weern mit sien Utprobeeren bi't Doon un Handeln, un so weer he door richtig jieperig achter her, dat man bloots woller 'n Jahr vörbi jachtert weer. "Wussten Sie schon, dass von einer Schweizer Firma kürzlich die schnellste Uhr der Welt entwickelt wurde - zu einer Stunde braucht dieser Rekord-Chronometer genau 43 Minuten und 12 Sekunden" - över düssen Witzkraam ut dat wunnerbaare "Pardon" harr de Oole lacht, as he dat vör mehr as veertig Jahren lees. Düsse Witz bröch em siene Kinnerjahren woller in'n Kopp - so'n fixe Rekord-Chrono- meter-Klock harr he dunntomalen liedensgeern hebben wullt. Wenn de Oole door nu över nadenken dä, denn müss he grienen. Wat sik de Tieden doch ännert, sinneer he. Nu versöcht he allens, dat de Tiet nich so gau lopen schull. Door bruuk he ehrer 'n Chronometerdings, dat för twee Stünnen dree Daag bruken deit. Denn de Oole hüng mit Hart un Seel an dat geruhige Rümsinneeren un Speelen mit allerlee Gedanken. He wull sien Bregen an't Lopen hollen, wull wat beleben un 'n paar neeje Infäll un Ideen in'n Kopp kriegen. Un för sowat bruuk he veel freeje Tiet för sik - mennigmaal mehr Tiet, as he in de Alldagsjachteree tosamenschrapeln kunn. Lebennig merrnmang doorbi sien un den Bregen so goot as't man geiht in de Gangen hollen - dat steiht för em babenan, eendoon of 'n Minsch twintig, sösstig or negentich Jahr oold is, un doorbi driesel den Oolen de oole Snack döör 'n Kopp: "Een Minsch leevt, de annere ward bloots öller." Lebennig un neeschierig blieben, sinneer de Oole, un ook doorto blinker ook noch so'n klooken Satz vun Stanislaw Jerzy Lec in sien Bregen op. "Manche leben mit einer so erstaunlichen Routine, dass es schwer fällt zu glauben, sie lebten zum ersten Male", harr de mal schreben. De Oole weer seker, dat em sowat mit nix as Routine nich passeeren schull, nich maal, wenn he döör 'n Wunner noch mehr as 'n paar Handvull vun Jahren döör de Welt geistern kunn.


 
   
     
   
     
      © by Nora Runge - Alle Rechte vorbehalten