Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Football
 

von Detlef Kolze

Ach du leeve Tiet, nu geiht dat woller loos, brummel de Oole vör sik hen un
wackel mit 'n Kopp. He harr dat Blatt vör sik op 'n Disch liggen un bekeek sik de Biller. Süüdafrika stünn door baben op de Siet. Veele vergnöögte swatte Gesichter weern to sehen, un dat geev Lüüd, de op jichenseen Placken Eer achter den Ball her jachtern dään. Jawoll, op düsse Siet dreih sik allens üm Football un üm de Weltmeisterschaft, de nu woller op 'n Kalenner steiht.

Man de Oole weer nich recht glücklich doormit. Nich bloots, dat he all siet veele Jahren gaar keen Feernsehkasten mehr in't Huus harr. Door kunn he ja wat an doon un eenfach een vun siene Frünnen besöken. Sowat sorg jümmers för'n kommodigen Abend, dat wüss he vun fröher her, denn tosamen Football kieken, dat is 'n annern Schnack as bloots alleen tohuus mit 'n Buddel Beer in de Hand in de Röhr to glupen.

Nee, sä de Oole, för mi is sowat veel to veel opregen Kraam. Un dat noch in sien Öller! So'n Döörnanner in de Seel, dat kunn ja to 'n Gefahr för Lief un Leben warrn! He kenn een, de sik vun sien Profeschoon her mit Ieshockey befaten müss, man wenn dat Speel op dat Enn op to leep, denn
müss he ruut gahn or afschalten. Door kunn he nich anners. Oftins sett he sik sogaar in sien Auto un kutscheer unrusig verkrüüz un verqueer döör de Stadt, bit dat de lesten Minuten vörbi weern, un denn telefoneer he un leet sik seggen, woans dat Speel utgungen weer.

Schull de Oole sik sowat ut freeje Stücken noch andoon? He weer tofreden
mit sien Leben un mit sien Alldag, un allens wat em door ruut locken wull, dat versöch he sik eerst maal vun'n Hals to hollen.

Nee, sä he denn, vundaage harr he gaar keen Tiet nich, he müss noch düt un dat beschicken, un denn weer door noch wat anners, wat he eegenlich op de Reeg bringen müss ...

An düsse Aart vun Utbüxen harr de Oole sik an wennt, un sien Fru un siene Frünnen wüssen, woans se doormit ümgahn kunnen. Man in een Punkt bleev de Oole mehrstendeels stuur: He wull sik nich opregen laten. Eendoon of dat nu 'n Film or 'n Footballspeel weer - he wull un wull dat nich insehen, dat he doorför ook noch Geld betahlen schull, dat he an't Enn mit 'n puckern Harten door seet un dat he achterna sien Last harr, dat he sien Seel woller in't Loot kreeg.

Förwiss, he müss dat togeben, wenn em denn doch maal een besnackt harr un wenn he mit doorbi weer bi so 'n Speel un wenn he dat denn denn in sien Kopp trecht fummeleert harr mit sien groot Opregen un wenn he denn över dat groote Beleefnis snacken kunn - nu ja, denn weer dat eegen-
lich ook jümmers ganz schöön wesen.

Maal sehen, woans dat för den Oolen bi düsse Football-Weltmeisterschaft aflopen dä - of mit or ohn Opregen ...
 




 
   
     
   
     
      © by Nora Runge - Alle Rechte vorbehalten