Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  BIP-Tollstock
  von Detlef Kolze Wenn de Minsch wat weten will, denn mutt he fragen, heet dat jümmers. Oftins wüllt de Minschen avers gaar nich so veel weten, un so fraagt se ook nich. Veele fraagt to'n Bispill nie nich, wat uuse Aart vun't weertschaft- liche Vörankamen eegenlich insgeheel kösten deit. So höört bloots 'n paar Tahlen, de stüttig grötter ward, un doormit sünd se denn tofreden. Dat stüttige Grötterwarrn un Wassen vun allens is in uuse Tiet de groote Parool, un dat löppt döör dat Anpurren un Oppuusten vun de Hökeree un Verköperee op de Eer. Man langt alleen dat Grötterwarrn vun düsse Verköperee-Tahlen hen, dat uus Leben worraftig beter ward? Un wat heet "uus" Leben? Dat Leben vun all un jeedeen döör de Bank, or mookt wi 'n Ünnerscheed mit Blick op de böverste un de ünnerste Schicht? Un meent wi dat Leben bloots in Düütschland un in Amerika or ook dat Leben vun de Minschen in Afrika? Veele Fragen, de veele Minschen gaar nich so recht stellen wüllt. Un denn dükert ook noch de Fraag na den Tollstock op, den wi door anleggen doot. In uuse Daag heet düt Maat "BIP" un meent allens, wat in een Land an Saken un Deensten verköfft worrn is. All dat annere, dat nich mit Geld betahlt ward, kummt door nich vör, ook nich, wenn door vermuckt veel Arbeit vun mennig Lüüd binnen steken deit. Een besünnern Knütten vun dat BIP-Maat liggt door in, dat de BIP-Tahlen ook grötter ward, wenn in een Land to'n Bispill 'n groot Malöör passeert is. Denn all dat Oprüümen un dat Versorgen un dat Bedoon vun Minschen mutt betahlt warrn, un dat veele Betahlen mookt de BIP-Tahlen nu maal grötter. Man düsse Aart vun Grötterwarrn vun Tahlen heet ja förwiss nich, dat düsse gröttern Tahlen ook dat Glück vun de Minschen grötter mookt hebbt. So is de Wetenschapp allerwegens op de Eer door achter her, dat se 'n betern Tollstock tosamenbosselt. Door schall denn nich bloots dat Wassen vun de Verköperee inboot warrn, man ook all dat, wat dat Minschenleben worraftig beter mookt. Door kaamt denn woller neeje Fragen vördaag, to'n Bispill woveel Minschen in een Land na School hen gaht un wat lehren köönt un of de Minschen noog betahlte Arbeit finnen doot, dat se sülbens för ehr Leben sorgen köönt. Jüst so steiht de Fraag door, of de Natuur ook nich döör dat Weert- schaften toschannen mookt ward un of de Minschen goot op'n Damm blievt un noog freeje Tiet hebbt. De Welt is vull vun düsse Fragen. Se mööt bloots luuthalsig noog stellt warrn. Anners kaamt de Lüüd in uuse Politik nich in de Gangen, dat se ehr Politik doorna inrichten doot. De BIP-Tollstock för dat Wassen vun uuse Weertschaft langt all langen nich mehr hen, wenn wi över dat Leben vun de Minschen in een Land wat weten wüllt.


 
   
     
   
     
      © by Nora Runge - Alle Rechte vorbehalten