Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Snacken un föhlen
  von Detlef Kolze Snacken hollt di dat Muul warm, heet dat - un woll ook dat Hart un de Seel. Dat meent nix anners, as dat an so 'n Snackeree un an so 'n Spraak mehr mit anbammelt, as dat wi bloots 'n Order or 'n Infall wietergeben wüllt. Verklaren un Wietergeben is bloots dat eene, denn jichenseen Spraak hett mehr an Bedüden för dat Rinföhlen un dat Lebennigsien in de Welt. De Plattdüütschen weet dat förwiss noch beter as de annern, de ehr Snacken mit gröttere Spraken afmoken doot - Spraken, de sik sogaar vundaage noch utbreden doot, as dat Ingelsche to'n Bispill or dat Chinee-sche. Jüst wegen dat, wat door noch mit anbammelt, jüst desterwegen hangt so veele plattdüütsche Minschen ehr Hart an düsse oole Spraak, de siet veele hunnert Jahren an't Afnibbeln is. Ehr Swögen bringt jem sowiet, dat se dat Afnibbeln ophollen un för mehr Plattsnackeree sorgen wüllt. Versöcht ward dat all langen. Dat groote Ümdreihen vun de Richt is door jüst nich bi ruut kamen, man anners weer villicht dat Plattsnacken in uuse Schoolen all langen vörbi un de plattdüüt-schen Narichten harrn keen Tokunft mehr. Ook dat Instituut för nedderdüüt- sche Spraak in Bremen blifft 'n Kraftakt, denn ut jichenseen Kass mutt dat Geld doorför nu maal ruut drüppeln. Man dat eene steiht woll fast - Plattdüütsch ruckelt sik op de groote Ledder ehrer na ünnen as na baben. Grünnen doorför laat sik finnen, to'n Bispill wenn wi maal kiekt, woans dat Snacken överhaupt in de Welt kamen is. Denn sogaar in de Vogelwelt funkscheneert dat Quinkeleeren mehrstendeels bloots döör dat Tosamenspeelen vun Mitbringen un Utpro-beeren. So brabbelt de Vogels jüst so as de lütten Kinner wat vör sik her un kaamt op düssen Padd quantswies dichter ran an dat, wat de Öllern all köönt. Speelen geet dat in de Minschenwelt, un door liggt in uuse Tiet een vun de grooten Knütten för Kinner, de in pracherige un elennige Ümstännen groot warrn mööt. Denn door hebbt de Öllern oftins keen Geföhl doorför, dat de Lütten bi ehr Speelen so massig veel doorto lehrt. Düsse Öllern be- griept nich, dat se ehre Lütten doormit sülbens vun'n betere Tokunft afschotten doot. Düsse afhangten Kinner bring dat oftins nich tostannen, dat se överhaupt richtig snacken un föhlen köönt, wenn se na School hen gaht. Oftins kriegt se keen fienföhligen Togang to de Welt rings ümto. Un wenn dat Utprobeeren un dat Brabbeln un dat Snackenlehren in de hoochdüütsche Moderspraak all tosamen schrumpeln deit, denn bruukt wi gaar nich eerst fragen, woneem denn nu dat Plattdüütsche afblieben deit. Wenn Snacken dat Muul un dat Hart un de Seel warm mookt, denn blifft dat bi mennigeen Kind vundaage koolt. För dat Tosamenleben vun de Minschen sünd dat keene gooden Utsichten, un för dat Plattdüütsche eerst recht nich.


 
   
     
   
     
      © by Nora Runge - Alle Rechte vorbehalten