Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Lögenhaft
  von Detlef Kolze Keen op de Ledder steiht, de mutt den Verstand in de Fööt hebben, heet dat. Man mehrstendeels bruukt wi uusen Grips direktemang baben in'n Bregen, un wi weet ja, dat sik ook de Verstand för de Fööt opletzt in'n Kopp afspeelen mutt, anners funkscheneert dat nich. Uuse Bregen is eefach dat Beste, wat wi hebbt, wenn wi in uuse Welt trecht kamen wüllt. Man wenn wi uus in düsse Tieden bekieken doot, op wat för'n Padd uuse Weert-schaft stüürt warrn schall, denn köönt wi licht op den Infall kamen, dat de Verstand bi düsse Aart vun Diskereeren koppheister geiht. Denn een grugelig Gebreken vun uuse Weertschaft mutt ja woll to allereerst anpackt warrn - de Arbeitslosigkeit. Sogaar na dat amtliche Tellen gifft dat tominnst 'n paar Millionen Minschen, de na Arbeit söken doot, un dat nich eerst siet güstern. Fraagt wi annere Experten, denn sünd dat sogaar fief or söss or noch mehr Millionen Minschen, de keen Arbeit finnen köönt. Man nu kaamt de Rezepten, de uus siet Jahren döör de Ohren bimmelt - mehr Stünnen arbeiten, nich mehr so veel Geld doorför kriegen, Lüüd lichter ruutsmie- ten können, mehr Flexibilität, Stüürn minner moken för de Rieken, de Staat schall nich so veel Geld utgeben un all düsse Snackereen. För mennigeen klingt düsse Snackereen villicht sogaar heel un deel verstännig, denn se kaamt uus vun allerwegens her in de Mööt, un dat mag ook angahn, dat door ja de eene un de annere Gedank doorbi is, wo'n tominnst över naden- ken kann. Man an de grugelig hooge Tahl vun de Arbeitslosen is ja nix anners an worrn, ofschoonst sik allens siet Jahren nipp un nau op düssen Padd döör de Welt snackt un ook handelt - dat kann jeedeen sehn. De amerikaansche Professor Paul Krugman nöömt düsse Snackeree in de New York Times "Voodoo-Ökonomie" - as wenn dat Glöven an jümmers desülbigen oolen Geisters worraftig wat helpen kunn. Ook in Amerika doktert se an düsse Knütten rüm, un door mookt se dat op düssen Padd noch veel duller mit dat lichter Ruutsmieten un den Staat nich so veel moken laten. Man door helpt dat jüst so wenig as bi uus - in't Gegendeel. Wenn sik de Verstand bloots noch op dat Geldverdeenen vun de enkelten Ünnernehmen richten deit, denn fehlt dat Henkieken na dat Ganze vun so eene Volksweertschaft, meen ik. Un ohn dat Utglieken ohn dat Achthebben op dat Tosamenleben vun de Minschen bringt uus de freeje Markt nix as Döörnanner un Ungerechtigkeit. Mi dücht, dat door veel lögenhaftigen Kraam doorbi is, wenn uus so veele Anföhrers jümmers woller wat vun düssen oolen Padd vertellt.


 
   
     
   
     
      © by Nora Runge - Alle Rechte vorbehalten