Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Söötkraam
  von Detlef Kolze De Oole seet an't Füür un leet siene Gedanken in'n Kopp hen un her drieseln. He harr sien Glas Wien drunken un doorbi in'n Book vun den klooken Gedankenspeeler Zygmunt Bauman över dat Vundaage mit all de Jachteree un all de Unsekerheiten leest. Nu harr he dat Licht utmookt, dat door bloots noch de Talglichter un dat Füür an't Glimmern weern. Un in den Oolen sien Kopp glimmer noch wat. Nich bloots de Rootwien, man ook de Gedank an'n Stück Schokolaad, as em dat week un sööt in sien Muul hen un her glipp. Eegenlich harr sik de Oole vörnahmen, dat he nich mehr so veel Söötkraam slickern wull. He föhl sik stark noog in sien Seel, dat he Herr över düsse Aart vun Lüsten warrn kunn. Doorför weer he ja woll ook oold noog, dat he sowat nich mehr bruuk, dach he. Man so as dat twischendöör jümmers maal woller utsehg, bruuk he dat doch. Denn de Schokolaad düker alltiet in sien Kopp op. Mennigmaal weer de Oole nich heel un deel seker, of sien Lengen worraftig bloots na de Schokolaad hen güng or of he ook Smacht op wat anners harr - Pudding to'n Bispill or Ies or Lakritzen. De Oole lüüster na binnen, wat he eegenlich wull, un glieks kunn he in sien Seel dat Strieden mitkriegen. Ha, keem dat ut de eene Eck vun sien Seel, du wist doch överhaupt nix mehr vun düssen söten Kraam, du ool Slickermuul. Holl du bloots den Rand, bölk dat ut de annere Eck trüch. Wat geiht di dat an? Mengeleer di nich door twüschen - Söötkraam is wunnerbaar. De Oole höör sik dat 'n Tietlang intresseert an, woans dat Diskereeren in sien Seel aflopen dä. Bloots denn un wenn maal stünn he eenfach op, güng na dat Schapp hen un fummeleer sik door wat ruut - 'n leckern Trüffel to'n Bispill or 'n Stück vun de Schokolaad, de em sien Fru anner- maal mitbröcht harr. Diskrereeren is jümmers 'n goode Saak, grien de Oole, man jichens-wenn mutt door ook maal 'n Doon bi ruut kamen. He taper denn trüch na sien Pulsterstohl, nöhm noch 'n Sluck vun sien roden Wien un drömel wieter vör ik hen. Wunnerbaar, wenn een so lebennig is, dat sogaar dat Diskereeren över wichtige Saken noch Vergnögen mookt, dach de Oole. Wi köönt door soveel för uus Leben vun lehren. Wat he door lehren kunn? Jüst dat to'n Bispill, dat all dat Diskereeren ook maal 'n Enn hebben mutt, doormit dat de Minsch opletz an't Doon kummt. Dat gellt nich bloots, wenn't üm Schokolaad geiht. Un dat Sinneeren un Diskereeren un Gedankendrieseln kann achterna ja ruhig wieter gahn.


 
   
     
   
     
      © by Nora Runge - Alle Rechte vorbehalten