Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Globaliseeren
  von Detelf Kolze Ham Se auch Streichhölzer oder sowas? So fröög dat bullerige Mannsminsch, dat door to'n Inköpen in den Laden rin suus. De Fru an de Kass lüüster na em hooch un sä nix. "Ja, was is?" drams de Keerl. "Keine Streichhölzer? Feuerzeug geht auch." De Fru tucks mit de Schullern un schüddel mit'n Kopp. "Non capisco il tedesco", sä se liesen un fröög vörsichtig: "Non parla italiano?" Man dat mook den Keerl richtig füünsch. Sowat kunn ja woll nich angahn, dat een nich Düütsch snacken dä, ook wenn't wiet weg weer vun Düütschland. He kunn doch nich extra Italieensch lehren, bloots wiel he sik in'n Apartment op Sardinien 'n beten verpusten wull. Dat mööt se ja woll trecht kriegen, dat se in düssen Koopladen op dat Eiland in't Middelmeer tominnst 'n beten wat vun de düütsche Spraak verstahn kunnen. Förwiss gifft dat sowat as'n Globaliseeren, door snackt se ja allerwegens vun un preestert, dat nu dat Hen un Her op de Welt stüttig mehr ward. Man dat kunn ja woll nich heeten, dat he annere Spraken in sien Kopp prökeln müss. He as 'n dennigen düütschen Keerl schull Italieensch lehren? Wat köönt Minschen driest un utverschaamt sien, wenn se man bloots blööd noog sünd. Meent worraftig, se köönt sik överall op de Welt opföhren, as wenn se to Huus weern. Worüm schull de Fru an de Kass vun 'n Supermarkt in Italien de düütsche Spraak lehren, bloots wiel so'n överkröppschen Tedesco opdüker un den grooten Macker speelen wull? Op'n bestimmte Aart un Wies harr düsse utverschaamte Macker mit sien Verlangen Recht. Denn dat Globaliseeren heet na dat Meenen vun uuse grooten Anföhrers nich, dat se sik op all de Sünnerlichkeiten vun de Welt instellen mööt. Nee, jem ehr Munster vun't Globalliseeren süht jüst so ut as dat vun uusen Keerl an de Kass vun den lütten italieenschen Supermarkt. De Minschen in de annern Länner vun de Welt mööt sehen, dat se fix to Potte kaamt un sik so opföhren doot, as de grooten Mackadoors dat hebben wüllt. Doorför kriegt se denn 'n paar Krömels af, de bi't groote Globaliseeren vun'n Disch fallt - wenn se denn vun'n Disch fallt.


 
   
     
   
     
      © by Nora Runge - Alle Rechte vorbehalten