Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Oogen op
  von Detlef Kolze Wat op Hoochdüütsch "Baumunfall" hett, dat kann de Minsch op Plattdüütsch nich so recht utdrücken. Dat is ook goot so, meen de Oole. Denn dat Woort is na sien Meenen vullstännig verdreiht un verkehrt. Wi snackt ja ook nich vun sowat as 'n "Laternenpfahlunfall" or 'n "Hausunfall", wenn jichenseen mit sien Auto door gegen ballert. Un de Bööm staht door noch veel länger as 'n Pahllücht or 'n Huus, un se muckst sik jüst so wenig. Jümmers sünd dat de Minschen, nich de Bööm, sä de Oole. Sowat passeert bloots, wenn se de Oogen in de Taschen hebbt or mit ehr Telefoon rüm hanteert. Or se sünd eenfach veel to hastig un ielig ünnerwegens, wenn se an't Stüür vun ehr Hutschefidels döör de Lannen brackert. Mit de Bööm hett dat afsluuts nix to doon. Ganz besünners opreegt is dat schimpen över der Bööm langs de Straten jümmers, wenn door besünners veel Bööm staht - an uuse schöönen Alleen, de door noch nableben sünd. Oftins verlangt de Experten denn worraftig, dat de Bööm weg haut ward, wenn se to dicht an'n Rand vun de Straat staht. Förwiss, sä de Oole, ik verstah düsse Öllern, wenn se vör so'n Boom staht un weet, dat jüst hier ehr eegen Kind to Dood kamen is. Man verdammig noch maal, de Boom weer dat nich, de dat Kind doot mookt hett. Dat weer dat Kind sülbens or de Minsch, de dat Stüür in de Hand harr Worüm mööt de Lüüd mit 150 Kilometters or noch mehr op düsse Straten langs brackern, ook wenn se nich richtig kieken köönt or wenn dat regent hett, grummel de Oole. De Boom hett door keene Schuld nich an. Schuld hett de Minsch an't Stüür, de nich oppasst or de sik för den Baas vun de Welt hollt, bloots wiel he 150 or 200 or noch mehr PS ünner sien Moors hett. Un so freu sik de Oole, as he annerletz in't Blatt lesen kunn, wat 'n Experte vun de Polizei to all dat seggt harr. Düsse Alleen sünd wunnerbaar, meen düsse Minsch, man worüm mööt door Autos döör brackern? Laat uus dat Padd för Lüüd tofoot or op't Rad trecht moken, un de Autos föhrt annerwegens - dat weer sien Vörslag. Dat is doch maal wat mit Verstand, freu sik de Oole. Un so lang, as dat noch nich so wiet is, lett sik dat villicht so inrichten, dat sik de Lüüd eenfach so'n beten mehr doorna richten doot, wat för jem gefährlich warrn kann. Mutt ja nich allens glieks wegrüümt warrn, wat sik de Lüüd to'n Anbuffen utsöökt, meen de Oole.


 
   
     
   
     
      © by Nora Runge - Alle Rechte vorbehalten