Plattdeutsch

Suchen:

> Übersicht
> Neuste Einträge
> Am häufigsten aufgerufen

Kategorien:
> De plattd��tsche Eck von Detlef Kolze
> De plattdüütsche Eck von Detlef Kolze
> Gedichte in Berliner Mundart
> Geschichten in Mundart
> Mundart- Gedichte
> Plattdeutsch
> Plattdeutsche Märchen
> Plattdeutsche Sprichw�rter
> Plattdeutsche Sprichwörter

 
  Gegen Nordwind
  von Detlef Kolze "Jungedi, wenn du plattdüütsch Theater op de Hööchte vun uuse Tiet sehen wist", sä de Oole to sien Fründ Gustav, "denn muttst du di stantepee op'n Padd na Osterholz-Scharmbeck moken." Gustav keek den Oolen neeschierig an un fröög sluusohrig, wat he nu jüst mit "Osterbeck-Scharmholz" to doon harr - düssen verdreihten Namen harr Gustav maal as 'n Anseggen in de Iesenbahn höört, un siet düsse Tiet müss he düsse Versnackeree jümmers woller anbringen. Eegenlich wüss Gustav dat nipp un nau, wat de Oole mit "Osterbeck-Scharmholz" to doon harr. Door weer dat "Kulturzentrum Gut Sandbeck" mit de "Scharmbecker Speeldeel", un door harr sik de Oole veele Jahren lang dat plattdüütsche Theaterspeelen ankeeken un veel door över to Papeer bröcht. Un düsse Speeldeel weer na den Oolen sien Befund alltiet för'n Överraschung goot. Gustav wüsst dat allens. Un liekers müss he siene dösige Snackeree över "Osterbeck-Scharmholz" anbringen un prickel denn ook noch rüm, of dat neeje Theaterstück denn ook wat to'n Lachen weer, so as he dat bi't plattdüütsche Theater jümmers hebben wull - anners güng he door gaar nich hen, brummel Gustav den Oolen an. De Oole leet sik nix anmarken, denn he kenn Gustav siene Ansichten över Spijöök un Schandudel in't plattdüütsche Theater. "Förwiss gifft dat wat to'n Lachen", sä he bloots, "man nich so, as wi dat kennt. Hier findt wi dütmaal nich woller Appels in Navers Gaarn, hier leevt Fru Pieper nich gefährlich, hier is keen Hörrohr un ook keen Utkamen mit't Inkamen un keen rooden Ünnerrock to sehen, un hier lüüstert wi nich na jichenseen Sluderkraam in't Treppenhuus. Hier sünd wi merrn in uuse Tieden mit Computers un elektroonsche Post ankamen un köönt uus an'n schööne Geschicht bekieken, wat düsse e-Mails för Döörnanner un Vergnögen un ook Seelenpien anrichten köönt." De Oole grien. "Gustav", sä he, "du muttst ook in't Plattdüütsche maal 'n beten ruut plieren in uuse Vundaage-Welt, un dat köönt de Speeldeel-Lüüd in Osterholz-Scharmbeck ganz wunnerbaar, dat segg ik di. Un se hebbt hier ook noch twee wunnerbaare Schauspeelers op de Bühn, door köönt de Profis noch wat vun aflehren, so goot sünd de beiden. Un se speelt in 'n heel un deel afsünnerlich Bühnenbild, dat du förwiss toeerst 'n beten wat verbaast kiekst, man dat funkscheneert afsluuts grootorrig." De Oole weer in Füür kamen. " 'Goot gegen Nordwind' heet dat Stück vun Daniel Glattauer, un dat hett de Scharmbecker Speeldeel noch bit to'n 22. Februwaar in't Programm. Dat is worraftig wat för all de Lüüd, de maal wat Neejes op Plattdüütsch beleben wüllt. Doorto kummt noch wat Besünneres: De Scharmbeckers hebbt dat Stück as'n Kooperatschoon mit dat Oldenburgische Staatstheater mookt. Door in Ollnburg weer dat toeerst to sehen, un nu is allens röver glippt in't Gut Sandbeck." De Oole smüüster Gustav to: "Un ik segg di noch wat: Wenn di dat nich gefallt, geef ik di een ut. Man annersrüm gellt dat ook: Wenn du bi de Scharmbecker Speeldeel dien plattdüütsch Spaaßvergnögen op neeje Aart harrst, krigg ik een vun di. Klaar?"


 
   
     
   
     
      © by Nora Runge - Alle Rechte vorbehalten