Kurkonzert

von Detlef Kolze

Mit sien Fru tosamen weer de Oole na Cuxhaben föhrt. Se wullen een vun de lesten schöönen Sommerdaag ruut picken un noch maal döör dat Watt tapern un in'n Strandkorf sitten. Se wullen 'n paar Stünnen lang eenfach nix doon, as bloots seelenruhig op de Welt sien.

Mit den Dag harrn se worraftig Glück. De Sünner blinker vun'n bagen Heben. De Luft weer warm, ook wenn door 'n stevigen Wind vun Noordoosten her puusten dä. De beiden leepen wiet ruut, bit dat se meist alleen in't Watt weern.

Mehr as twee Stünnen weern de beiden in't Watt ünnerwegens, un nu weer de Strandkorf an de Reeg. De hollt den Wind af un fangt de Sünn in, un so kunnen de Daagblädder ruut fummeleert warrn. Doorto geef dat Tee ut de Thermosbuddel un 'n Stück Broot.

Rundüm speelen de Kinner, un de Mannslüüd weer mit de Draken an de Gangen. So weer dat för de beiden Oolen dat blanke Idyll door an'n Strand vun Cuxhaben. De Sünn sack suutje daal. Dat Water weer an't Aflopen. De Möwen tapern döör den Sand un strieden sik mit de Kreihen, de dat fröher an'n Strand ook nich geef.

Man miteens wummer vun de Siet her jichenseen Disco-Musik loos. De Oolen keeken sik an. Dat dröff ja woll nich wahr sien! Wat schall dat nu sien? Tja, dat weer dat, wat fröher maal "Kurkonzert" heet un dat nu woll besünners de jüngern Lüüd anlocken schull. De Oole keek na. Nee, door seten veele öllere Minschen un mümmeln ehr Braatwust un Pommes un leeten sik de Ohren vull dunnern.

De Oole taper ruut in't Watt. Man door weer ook nix mit Stille. De Wind blaas de Wummermusik nich bloots över den Strand, man ook wiet in't Watt ruut.

Förwiss, för de beiden Oolen bleef dat een vun de lesten schöönen Sommerdaag an'n Strand vun Cuxhaben.

Bloots dat vermuckte neemoodsche "Kurkonzert", dat harrn se worraftig beter weglaten.