Överraschung

von Detlef Kolze
De Oole weer an't Enn vun de Sommertiet noch maal na Italien reist. De Toskana wies sich vun de schöönste Siet. De Tempratur weer so hooch, dat em de Sweet bi't Wandern man bloots so den Rüüch daal drübbel. Sogaar in de Nacht weer dat hitt, un so kunn he de Kleddaasch weglaten. Dat weer 'n Wedder, dat de Norddüütschen normaal nich in de warmste Sommertiet beleben köönt.
Wenn de Minsch ünner düsse Ümstänn 'n Tietlang leevt, denn drieselt em annere Wetterlagen licht ut'n Kopp. Desterwegen beleev de Oole op de Fahrt trüch meist 'n Schock. Un dat füng all in Italien an. Door harr he sik in de Neegde vun Cannobio an'n Lago Maggiore inquarteert. Den eersten Avend seet de Oole noch op'n Balkon un bekeek sik vergnöögt de schööne Landschaft mit all de Bargen, de veelen Bööm un den grooten See. Förwiss dat weer 'n beten wat köhlig, man dat weer ja ook de Avendtiet.
Avers den annern Morrn keem de Schock: Buten nix as düüstere Wulken, grugeligen Regen un griese Nevelslier. Versteiht sik, de Oole mook sien Gang wieter na baben rin in de Bargen. Man as he dree Stünnen later trüch keem, weer he natt bit op dat Fell. Sien oolen Regen-Poncho suug dat Regenwater mehr op, as dat he dat afperlen leet. Büx weer pladdernatt, siene Schullern ieskoolt. Siene Fööt slabbern in de Schoh, as güng de Oole in lütte Baadwannen döör den Wald. De lüürlütte Stuuv in de Buurnhoff-Pension sehg nu ut, as harr door 'n Bande vun Rövers ehr Ünnerkamen funnen. Allerwegens hüng un stünn wat to'n Drögen rüm: Jack, Poncho, Hemd, Büx, Strümp, Hoot, Stebel. Warm weer dat nich, denn op sowat sünd se in Italien to düsse Tiet mehrstendeels nich inricht, un so kunn de Oole bloots noch in sien Bett krupen un door op luurn, dat he warme Fööt kreeg.
Door leeg de Oole in sien Röver-Stuuv un sinneer, dat so'n Grugelwedder-Beleevnis villicht ook sien Vördeel hebben kunn. "Wenn ik woller tohuus an de Küst ankamen do, denn kann dat Weer door eegenlich bloots noch beter sien as düsse Grugel-Regen", meen he. Un sowat is doch för 'n Noorddüütschen bi't Trüchkamen ut'n Urlaub in Italien förwiss maal 'n schööne Överraschung.