Op'n Kopp

von Detlef Kolze

Mit Terroristen weer dat to all de Tieden 'n heel un deel verdreihte Saak. Door geef dat to'n Bispill maal een, de so'n rechten Verbreker weer. He hett sogaar maal 'n Kumpaan in Berlin ut dat Tuchthuus Spandau ruut hoolt.  Tosamen mit 'n paar Helperslüüd hett he door 'n Överfall mookt un müss achterna gau afhauen. Twaars harrn se em överall mit Steckbreef söcht, man se harrn em nich faat kreegen.
Verwunnerlich is bloots, dat jüst düsse Mann achterna in Amerika sogaar 'n Minister warrn kunn un in mennigeen Geschichtsbook över dat 19. Jahrhunnert as Minsch mit 'n goot Ansehen vörkummt. He gellt nu as 'n Demokrat un as 'n Vörbild för 'n oprechten poliitschen Minschen. Sien Naam is Carl Schurz.
So is dat - to siene Tiet weer düsse Minsch as'n Terrorist, denn he weer gewalthaftig an't Fechten un Strieden wedder Ümstänn, de dunntomalen in't Recht weern. Bloots wenn sik düsse Tieden denn ännert, denn heet so'n Minsch opmaal nich mehr Terrorist. Denn war de villicht sogaar to 'n Vörbild för dat Strieden üm mehr Recht un Gerechtigkeit. Un wenn he doorbi mit Gewalt as'n Verbreker vörgüng, denn ward dat an de Siet schaven, wiel düsse Tieden dunntomalen eben 'n groot Unrecht weern.
De Geschicht is vull vun düsse Geschichten, de dat Kunterfei vun'n Minschen över de Jahren vullstännig op'n Kopp stellt. Terrorist heet 'n Minsch, wenn he sik nich an dat ungerechte Recht vun siene Tiet hollt. Ännert sik de Ümstänn, denn ward desülbige Minsch miteens 'n Vörbild. Mi dücht, sowat dröfft wi nich ut de Oogen verleeren, wenn wi över Terroristen snacken doot, meen de Oole.
För de Nazis to'n Bispill weern all de Lüüd nix as Verbreker, de wedder Hitler un sien Unrecht gegenan güngen. Veele Minschen in Düütschland dachen in düsse Jahren twüschen 1933 un 1945 jüst so. Se hebbt schimpt över Minschen as Sophie un Hans Scholl. Man dat duur bloots 'n paar Jahren, bit de Nazi mit ehr grootorrig Riek tosamenballert weern. Achterna weern de beiden kurascheerten jungen Lüüd as Helden ansehen.
Mi dücht, dat wi sowat nich vergeten dröfft un jümmers nipp un nau henkieken mööt, meen de Oole. Bi Carl Schurz un de beiden Scholls weer dat klaar - dat güng jem üm de Rechten vun Minschen, üm Demokratie un 'n goode Tokunft för all de Minschen in een Land.
Villicht köönt wi düssen Gedanken as 'n Maatband nehmen, sä de Oole. Doormit köönt wi denn vörsichtig afmeten, of ut so'n Terroristen later villicht maal 'n Vörbild för dat Strieden üm Minschenrechten warrn kann.