Annerwegens

von Detlef Kolze

Nich wiet af vun't Dörp ligt de schööne See. Fröher geef dat door 'n grooten Campingplatz. De sorg för Leben. Veele Lüüd harrn door 'n duurhaftigen Platz un weern tominnst över de Sommertiet buten. To düsse Tiet harrn se ook 'n lütte Piesel inricht. Door kunnen de Gäst wat to drinken un to eten kriegen, ook wenn se bloots maal för 'n paar Stünnen to'n Swümmen un In-de-Sünn-Dösen an den See  föhrt weern.
Dat is nu siet 'n paar Jahren vörbi. De Campingplatz bröch nich mehr noog Geld in de Kass vun de Gemeende. Dat Hegen un Plegen köst sogaar mehr, as dat inbröch. De Gemeende harr nich noog Geld, dat se för de nödigen Inrichtungen an den See sorgen kunn. Leddige Kassen - sowat gifft dat nu in veele annere Gemeenden. So füng ook hier dat Bölken na jichenseen "Investor" an, de mit Geld in de Hannen opdükern schall un wedder för Leben in de Bood sorgt. Man woans funkscheneert dat? So een Minsch mit veel Geld will opletz mehr Geld ut sien Vörhebben ruut trecken, as he vörher insett hett.
Woans geiht dat? De Lüüd op den Campingplatz mööt deeper in de Taschen griepen as vörher. Wenn een bloots to'n Swümmen kummt, dann heet dat för dat Baden in See un Sünn betahlen. Un wenn dat Grundstück groot noog is, denn ward  dat in lütte Stücken opdeelt un ward verhökert. So löppt dat mit 'n "Investor", un anners kann dat ünner de Ümstänn vundaage ook nich lopen. Man veel to wenig Minschen stellt de Fraag: Is door nix an to ännern, dat de Gemeenden in uuse Daag allerwegens nich noog Geld in de Kass hebbt? Un mutt dat op de annere Siet so sien, dat allerwegens "Investors" rüm lopen doot? Investors, de nich weet, woans se ehr Geld so insetten köönt, dat se achterna mit noch mehr Geld döör de Gegend klabastert un de Welt unseker mookt? Is sowat allens de blanke Natuur, dat 'n door nix an ännern kann? fraagt de Oole. Or is dat nich doch Politik, un door köönt wi in uuse Demokratie förwiss wat anners moken?
Ook op düt Rebeet blifft dat richtig, wat de Dichtermann Bert Brecht maal för Kinner riemelt hett: "Armer Mann und reicher Mann / Standen da und sahn sich an. / Und der Arme sagte bleich: / Wär ich nicht arm, wärst du nicht reich." Un vundaage heet 'n schöönen Snack doorto: "Das Geld ist doch nicht weg. Es ist nur woanders." Un bi düsse överbasig rieke Blaas vun Minschen, door mööt wi dat Geld wegholen, seggt de Oole. Nich allens, dat versteiht sik. Man tominnst 'n beten mehr, as dat nu passeert. Denn de mehr hett, de kann ook mehr in de allgemeene Kass betahlen.