Fake News

von Detlef Kolze
Fake News - dat is so'n Snackwort, dat in uuse Blädderwelt rüm suselt un de Lüüd döörnanner bringen kann. Denn in uuse Tieden hebbt nu maal ook lögenhaftige Figuren freeje Bahn, wenn dat bloots noch üm Sekunnen geiht, bit dat jichenswekke Narichten rund üm de Welt fladdert sünd. Oftins geiht dat doorbi üm veel Geld, denn in't Internet steiht Reklaam wiet babenan - je mehr de Lüüd wat anklicken doot, je mehr Geld köönt se kasseeren. So wiet, so slecht.
Man dat kann ook passeeren, dat de Spijöökenmokers twischendöör maal mehr Wahrheit op ehr Siet hebbt as de eernsthaftigen Schrieberslüüd. Wi weet: Eernsthaftig heet noch langen nich klook un verstännig. Bi den klooken Lichtenberg is to lesen: "Es gibt Leute, die glauben, alles wäre vernünftig, was man mit einem ernsthaften Gesicht tut." Un Mark Twain schall maal seggt hebben: "Manchmal frage ich mich, ob die Welt von klugenKöpfen regiert wird, die uns zum Narren halten, oder von Schwachköpfen, die es ernst meinen."
Mit "Fake News" is dat desterwegen oftins nich so eenfach, as dat toeerst utsüht, meent de Oole. So lees he annerletz (dat weern de lesten Daag, as de oole amerikaansche Präsident Obama noch op sien Posten weer) 'n Bericht in dat amerikaansche Blatt "The New Yorker". Door stünn, dat jüst in düssen Oogenblick vör dat Witte Huus in Washington groote Lastwagen opdükert sünd un een na den annern opladt ward.
Un wat stünn wieter in düssen Bericht? De Lastwagen-Lüüd transporteert allens af, wat noch an "Kompetenz, Würde, Optimismus und Fortschritt" in dat Präsidentenhuus to finnen weer. Jüst so schall dat mit all de Resten vun Klookheet, Mitleed un Trüchhollen passeeren. De neeje Präsident hett kummandeert, dat he vun all dat nix mehr sehen will, wenn he door intrecken deit, weer in den "New Yorker" to lesen.
Förwiss, wi markt dat fix: Door harr sik 'n Spijöökenmoker wat utdacht. Satire heet sowat, un mennigeen mag dat ook as "Fake News" ansehen, denn düsse Text weer as 'n aktuellen Bericht trechtmookt, un dat weer ja so nich korrekt.
Un liekers stickt in düssen lütten Text mehr an klooke Kritik an den neejen amerikaanschen Präsidenten as in mennigeen langtöögsche Schrieberee.
Wat klook un richtig is, dat köönt wi oftins nich so licht ruut finnen, meent de Oole un dach doorbi an Heinz Erhard. "Jetzt weiß ich auch, warum sie Köpfe haben", hett de maal över de Döösköpp schandeert. "Da brauchen sie das viele Stroh nicht in der Hand zu tragen."
Dat dröff uus nich passeeren, seggt de Oole - ook nich mit "Fake News". Bi sowat mööt wi op de Wacht sien, denn Fake News köönt mennigmaal de Wahrheit vördaag bringen.
Fake News köönt ook maal Klook News sien.