Kaffeepaussi

von Detlef Kolze De Oole harr oftins ’n Rochus op so’n besünnere Aart vun Plattdüütsch-Preesters, de ook in uuse Daag noch "de oole Sassen-Spraak" verdeffendeeren wullen. He höög sik denn, wenn he bi Goethe den Satz in de Finger kreeg, dat sik de Knööf vun’n Spraak door an wies, dat se dat Frömme in sik opsugen kunn. So weer he annerletz ook heel un deel vergnöögt, as he in’t Blatt vörsett kreeg, wat annere Spraken op de Welt ut de düütsche Spraak opnahmen harrn. Mennigeen Woort weer nix Neejes, to’n Bispill dat Utwandern vun de Wöör "Autobahn" un "Kindergarten" un "Zeitgeist" na de ingelsche Spraak röver. Wat he noch nich wusst harr, weer dat Utbüxen vun "Butterbrot" na Russland or vun "Leitmotiv" na Frankriek. Meist lachen kunn he över een düütsch Woort in'n Süden vun Afrika. Door harrn se woll in fröhere Tieden jümmers woller een vun düsse opregten Keerls beleben müssen, de bloots an’t Dramsen un Drauhen weern mit de berlinschen Wöör "Aber jetze...!" Dat harrn se opbewahrt, un so nöömt se bit in uuse Daag een Minschen, de keen Gedüür hett, ’n "Aberjetze". Förwiss gifft dat ook in ehr eegen Spraken Wöör för düsse Aart vun Dramsbüdel, man dat klüng in den Oolen siene Ohren so schöön, dat he nu sä: "Kiekins, door kummt woller so ’n Aberjetze!" Dat kummt den Oolen nu jümmers in'n Kopp, wenn he sien Koffiepaus hett, dat ja ut de hoochdüütsche Kaffeepause röver wannert is. Dat sowat nich bloots ’n schööne Saak is, wenn de Minsch sik för ’n Tietlang verholen kann, man dat de düütsche Spraak doorför ook noch ’n schöön klingen Woort hett, dat hebbt ook de Finnen ruutfunnen. "Kaffepaussi" heet dat door. De Oole grient: Wat de Finnen köönt, dat kriegt wi Plattdüütschen all langen tostannen.