Dat Biller-Speel

von Detlef Kolze

Dat sehg so ut, as kennen sik de beiden jungen Lüüd noch nich lang, as se door an'n Strand tosamen seten. Se harrn sik ehrn Placken op 'n paar Steen vun de lange Buun söcht, Zigaretten anmookt un veel mit'n anner snackt. Twischendöör harrn se de elektroonsche Camera ruut fummeleert, un denn moken se Fotos vun'n anner. Doorbi harrn se veel lacht un gnickert.

De Kleddaasch vun de beiden weer heel un deel swatt. Allens slacker so'n beten wat üm ehrn Lief, bloots de Schullern vun de Deern krupen vördaag. Ehr Hemd glipp jümmers hen un her, un dat müss för ehrn Fründ nich ganz licht sien, düsse Hen-un-Her-Glipperee vun Hemd un Huut geruhig antokieken. So versöch he twischendöör maal, dat Hemd noch 'n beten wieter na de Siet hen to schuven, man door wull de Deern nich veel vun weten. Se ruckel allens woller trecht un smüüster em vergnöögt in de Oogen. Denn nehm se miteens den Fotoapperaat, stünn op un güng 'n paar Schreed an de Siet.

As se mit'n Rüüch na den Jungen hen stünn, schuuv se sik ehr Hemd vun de Bost weg un fotografeer sik sülbens 'n paarmaal - vun baben her un vun de Siet un vun ünnen. Se wackel mit 'n Lief un lach sik meist kaputt, as se door mit Kamera un Hemd an de Gangen weer.

Denn keem se trüch, keek ehrn Fründ för 'n paar Sekunnen in de Oogen, grien liesen un holl em den elektroonschen Fotografeerkasten vör de Nääs. He töger 'n Momang un lang sik denn dat Dings her, dat he nu tominnst so'n beten ünner de Deern ehr Hemd plieren kunn - nich in echt, man tominnst eerst maal op den lütten Bildschirm vun de Kamera. Of em dat so recht behagt hett, kunn nüms nich sehen, denn mit Snackeree un Gniggelee raffeln sik de beiden ehrn Kraam tosamen un dammeln wieter den Strand langs.

Schöön weer de beiden ehr Speelen mit dat Kieken un dat Versteken un dat Vörstellen. Dat weer dat, wat sik döör de heele Minschengeschicht döör trecken deit: Wi mookt uus Biller vun jichenswat, dat nich direktemang to sehn is. Wi stellt uus vör, wat för uus eerstmaal nich to bekieken is, un mennigmaal kriegt wi dat ook later nur quantswies or villicht sogaar gaar nie nich vör Oogen.

Klaar is: Weern de beiden jungen Lüüd an jichenseen FKK-Strand to'n Nakeltbaden wesen, denn harrn se ehr Biller-Speel nich speelen kunnt. Denn legen de "nackten Tatsachen" vun Beginn an klaar vördaag. Jeedeen Aart vun Vörstellen weer slicht un eenfach unnödig. Mi dücht, door harr wat fehlt för de beiden jungen Minschen, de door villicht dat eerste Maal tosamen an'n Strand ünnerwegens weern.