Football-Fever

von Detlef Kolze

De düütsche Footballmannschaft speel in Süüdafrika gegen Spanien, un de Oole seet in'n schöönen Beergaarn an'n Fluss. Ünner groote Eekbööm
lüüster he na de Musik. Peter Caulton heet de Minsch, de door alleen mit sien Gitarr op de Bühn togangen weer. He speel wunnerbaare Saken vun
Johnny Cash un annere Country-Lüüd.

Dat Footballspeel schull nu bald anfangen. De Oole wunnerwark, worüm door noch so veel Lüüd in den Beergaarn seten. Ook as de Klock op halvig negen to güng, mook sik nüms op de Been. In de Stadt weern de Straten all veel fröher leerig puust. Hier weern de Minschen tofreden mit Beer drinken un Braatwust eten. Meist nich to glöven ...

Man de Oole föhl sik goot doorbi. He nöhm dat as 'n Bewies, dat he nich vullstännig alleen döör de Welt klabaster - as 'n unbedarften un ahnweten Football-Dusseldassel. Dat geef noch annere vun düsse Soort. De harrn in düsse opregten Football-Tieden ook nich veel an'n Hoot mit Football-Kieken.

In de verleden Weken weern de Zeitungen vull vun dat groote Footballver-
gnögen. Ook in 't Feuilleton kunn de Oole lesen, dat de Lüüd Füür un Flamm weern för de Weltmeisterschaft un dat sik door nüms nich över op-
regen schull. "Fußballfieber" darf unbekümmert frei sein von schlechtem Gewissen", stünn door. "Sportfieber ist Spaß an der Welt, das nicht dauernd vom kühlen Verstand niedertemperiert werden will."

Dat güng den Oolen direktemang an. Denn mennigmaal ramenter dat in sien Seel wedder dat blinne Spaaßvergnögen. He wull un wull dat nich be-
griepen, dat sik so veele Minschen so wenig för de worraftig wichtigen Knütten op de Eer intresseeren doot, avers wenn dat Footballkieken loos güng, denn bleef nüms tohuus, un se biestern allerwegens döör de Straten.

Man de Zeitungskritikaster harr woll recht: Dat harr keen Sinn nich, dat he jümmers dat eene un dat annere in een Pott tosamen röhren wull.

Un as dat an düssen Avend buten allens still un ruhig bleev na dat 1:0 för Spanien, door föhl de Oole, dat he meist wat missen dä. Jüst so as de veelen annern harr he sik door an wennt, dat de Saak för de düütsche Mannschaft stracks liekut un na vörn güng. Villicht kunn 'n door ja wat vun lehren, sinneer de Oole, denn woneem gifft' sowat, dat 'n Saak jümmers goot un liekut wieter geiht?

Schöön eegenlich, güng em dat döör 'n Kopp. De Weltmeisterschaft weer sogaar för em as oolen Football-Quarkbüdel 'n Anpurren to'n Mitföhlen un Nadenken. Un villicht schull he sik nu doch tominnst dat Endspeel ankie-ken. Villicht kunn he sülbens ja noch mehr doorto lehren.