Veel to fix

von Detlef Kolze

De Oole hett noch wunnerbaare Reflexen - dat is worraftig wahr. In Nullkommanix kriggt he spitz, wat jüst passeert, un denn avers op em daal! Door gifft dat keen Tögern un keen Dösig-Kieken nich. Door heet dat bloots: Nu geiht dat ran an'n Speck!

Annerletz weer he to'n Bispill ünnerwegens un spazeer vergnöögt döör de Welt. De Sünn blinker twischen de Wulkenwuselee döör, un de Oole föhl sik waak un kregel. Man miteens keem door 'n rechten Lorbass vun Bö üm de Eck. As so'n Wuselwilli kreeg düsse Stormwind den Oolen sien Strohhoot faat un reet em dat Dings vun 'n Dööts, dat 'n anner Minsch villicht bloots mit achter sien Hoot her gluupt harr.

Ratzfatz stöker siene Hand na baben un hau den Hoot as'n Pietsch na de Eer rünner. In'n sülbigen Momang rupps he dat Been hooch, un denn rop mit den Foot op sien Hoot. So, doormit harr dat Wegfleegen nu hasterklabaster 'n Enn funnen. Förwiss, dat müss de Oole togeben: De Hoot weer nich mehr to bruken. Platt as'n Pannkoken leeg dat vermuckt düüre Ding an de Eer un weer twei, vullstännig twei.

Annermaal weer de Oole in de Köök togangen, un door glipp em doch unverwachtens so'n schööne Tass ut de Hand. Man de Hand wit un flöög in'n grooten Bogen wedder de Wand. Door leeg se denn vullstännig an de Eer, bloots dat de veelen schöönen Tassen-Stücken nich mehr an de rechte Stee weern. Nu ja, ook in düssen Fall harr sik dat nich verlohnt mit den Oolen siene gooden Reflexen. Villicht hüng dat eenfach bloots tosamen, dat he veel to fix weer. De Tass tominnst weer eegenlich op'n dicken Teppich fullen, ehr dat de Oole mit siene gooden Reflexen doortwüschen keem un dat Dings dweer döör de Köök an de Steenwand baller.

Man as de Oole sik 'n annermaal trüchhollen dä un eenfach aftööv, bit dat sien Glas op'n Bodden in dusend Stücken ut'n een flöög, door keek em sien Fru an un meen: Segg maal, wat is mit di denn passeert? Du snackst doch jümmers rüm vun diene gooden Reflexen, un nu steihst du door as dösig un mookst keen Mucks nich?

De Oole tucks mit de Schullern. Ik bün woll eenfach to fix för düsse Welt, grummel he, un denn un wenn kann ik nich dat rechte Maat finnen.